Direktoratet for naturforvalting ynskjer gjennom
Nasjonal handlingsplan for slåtteenger å få på plass eit forvaltingssystem der landbruks- og miljøstyresmaktene i kommunar og fylke rettar eit
sams fokus spesielt mot skjøtsel av slåtteenger.
Telemark er peika ut som eitt av fire prøvefylke. Deltakinga fell saman med Fylkesmannen i Telemark si deltaking i Arvesølv, eit prosjekt i regi av Bioforsk med føremål å sikre langsiktig skjøtsel av kulturmark med spesielt store biologiske og genetiske verdiar. Telemark si deltaking i Arvesølv og Nasjonal handlingsplan for slåtteenger blir såleis båe leia av Ellen Johanne Svalheim frå Bioforsk Landvik Øst.
Ny tilskottsordning
Når det gjeld Nasjonal handlingsplan for slåtteenger ynskjer ein å få på plass ei oversikt over dagens bruk av eksisterande tilskottsordningar til dette føremålet. Det er fyrst og fremst snakk om SMIL, sidan RMP-ordninga i Telemark per i dag ikkje dekkjer skjøtsel av slåtteenger på lokalitetsnivå. Ein vil vidare sjå nærmare på korleis desse ordningane fungerer for eigedomar både innanfor og utanfor produksjonstilskottssystemet.
Samstundes vil det med midlar frå DN bli innført ei ny tilskottsordning for skjøtsel av slåtteenger. Denne vil delvis koma til å avløyse eksisterande ordningar, delvis komplettere dei. Det er eit mål å få lik betaling for likt arbeid frå kommune til kommune, og anten ein er produksjonstilskottsberettiga eller ikkje. Det er antyda ein sats på ca. 2000 kr/daa. Det er enno ikkje eksakt fastsett korleis dei ulike ordningane skal samkøyrast i praksis.
I utgangspunktet vil det vera naturleg å tenkje at SMIL-midlar nyttast i ei restaureringsfase (eingongstiltak), medan årleg skjøtsel dekkjast gjennom ein kombinasjon av RMP- og DN-midlar for dei eigedomane som er produksjonstilskottsberettiga, medan dei som ikkje er det ev. får heile satsen uavkorta frå DN. Dette kjem ein nærmare attende til etter kvart. I begge tilfelle skal det i samråd med grunneigarane utarbeidast skjøtselsplanar og avtaler med ei tiårig ramme.
Regionale aktørar
Ressursgruppa for slåtteenger i Telemark er samansett av Kulturlandskapssenteret i Telemark/Ingvill Marit Buen Garnås og Norsk landbruksrådgivning Østafjells/Knut Volland. Vegleiar er Bioforsk Landvik Øst/Ellen Svalheim. Fylkesmannens miljøvernavdeling er formell oppdragsgjevar og kontaktperson der er Trond Eirik Silsand. Fylkesmannens landbruksavdeling er representert ved Harald Tveit.
Framdrift
Målet er at alle slåtteenger som er registrert som
viktige eller
svært viktige lokalitetar i DN si naturbase (
www.naturbase.no) skal vera omfatta av ordninga innan 2015.
I 2009 har ein byrja med å gjennomgå og utarbeide skjøtselsplanar og avtaler for 3 eigedomar i Hjartdal og Seljord. Det arbeidast òg med å få på plass ein mal for skjøtselsplanar og grunneigaravtaler. Skjøtselsplanane vil ha ein generell del som vil vera felles for alle slåtteenger innanfor ordninga og ein meir spesifikk del for kvar lokalitet.
Innan årsskiftet ynskjer ein òg å få ei oversikt over kva for eigedomar me skal forsøke å få med i løpet av 2010 og 2011. Ein tek da utgangspunkt i det som ligg inne av registreringar knytt til DN si naturbase, SMIL-data (tidl. STILK-data) og ymse lokalkjennskap.
Etter tilrådingar frå Bioforsk/Ann Norderhaug vil ein i 2010 ta mål av seg å i alle fall fange opp dei fleste aktuelle eigedomar i Hjartdal kommune og Seljord kommune. Desse kommunane har frå før løyva midlar til eit lokalt prosjekt der ein skal oppdatere og komplettere eksisterande registreringar og leggje til rette for aktiv skjøtsel og eventuelt samarbeid og fellesordningar grunneigarane i mellom. Dersom det er kapasitet til det, vil me gå vidare ut allereie i 2010. Det er uansett viktig å få eit oversyn over aktuelle lokalitetar for 2011 allereie no.
Ein førespurnaden er fyrste omgang sendt ut til kommunar i øvre Telemark,
dvs. kommunane i Vest-Telemark, Hjartdal og Tinn. Fram mot 2015 skal heile fylket dekkast.
Les meir om Nasjonal handlingsplan for slåtteenger ved å klikke
her.
