Om Svartdal, Hjartdal og Bondal

Nabobygdene Svartdal og Hjartdal høyrer omsynsvis til i kommunane Seljord og Hjartdal, og utgjer til saman eit kulturlandskap med stor verdi på nasjonalt plan. Under Nasjonal registrering av verdifulle kulturlandskap i 1994 (Miljøverndepartementet/Direktoratet for naturforvaltning) blei dei saman valt ut som eitt av fem viktige samanhengande område med særs store kulturlandskapsverdiar i Telemark. Området strekkjer seg frå Hjartsjåvannet i aust, via den tronge Ambjørndalen til Svartdal i vest.

Lenger nord i Hjartdal kommune ligg også Bondal, sidedal til Tuddal like under Gaustatoppen. Bondal blei som einaste område i Telemark valt ut som Spesialområde.

Systermarihand. Foto: Gunhild Geirsta

I Svartdal, Hjartdal og Bondal finn ein i dag jordbrukslandskap som er mindre påverka av moderne driftsformer enn jordbrukslandskap dei fleste andre stader i fylket. Dei naturlege forholda har gjort utstrakt modernisering vanskeleg, og slik har kulturlandskapet her fått eit naturleg "vern". Utfordringa ligg i å oppretthalde eit aktivt landbruk og samstundes dei tradisjonelle driftsformene.

Bygdene er prega av verneverdige bygningar og tun, steingjerde og andre tradisjonelle gjerdetypar, gamle beitemarker og slåtteenger i hevd, lauvingslier, gamle ferdselsårer osb. Dei urterike slåtteengene representerer eit stort biologisk mangfald som er unike i nasjonal samanheng. Mellom anna finn ein i området Hjartdal-Svartdal landets største førekomst av Systermarihand.

Gjennom ulike prosjekt og tiltak dei siste åra viser folk aukande entusiasme og forståing kring problemstillingar og utfordringar knytt til kulturlandskapsspørsmål. Gjennom utallige dugnadar og markdagar har dei vist at dei kan dra i lag. Det gjev seg synlege prov i området. Bygningar er blitt restaurert, gjerde er sett opp og store område og ferdselsårer er rydda. I tillegg arrangerer bygda kvart år ein slåttefestival med stadig større popularitet. Det er òg lokale krefter som har arbeida for stiftinga av senteret.